Pakaian Adat Simalung

Topik sebelumnya Topik selanjutnya Go down

Pakaian Adat Simalung

Post  Pembajak on Fri Mar 02, 2012 10:34 am




BULANG





Oleh : Berlian Saragih

Parlobeini.

Buei do naidah bani na masa sonarion bani horja adat ha-Simalungun-on, mubah, magou anjaha maseda arti ni sada-sada horja atap ugas. Sada humbani na sinobut ilobei in ai ma: BULANG. Marhitei na sinurathon on, na araphon boi hita marsipodah-podahan, sonahado na sasintongni ampa sitalupan.

Arti ni Bulang.
Bulang aima pakeian ni simanjujung ni parinangon. Bulang ai ma na mambungkus pakon manrahut jambulan ni parinangon, ase ulang hurei-hurei atap janggei-janggei songon jambulan ni dakdanak sonai age anak-boru. Ai ma homa na gabe legan ni parinangon humbani dakdanak pakon anak-boru. Ai pori pe martudung anak-boru, halani udan atap milas ni ari, sedo na marbulang goranon ai. Ai ma ase, sapari, pantang (hailaon) do mardalani sahalak parinangon hu darat ni rumah anggo seng marbulang ia. Ai ra do dong garama (na lang manandaisi) roh mandohori (manondur) halani iagat anak-boru.
Sondahan on lang piga be parinangon na marbulang, anggo sedo sanggah dong horja adat atap pesta. Parinangon na marumur lobih 90 tahun na ihuta mando na ra marbulang ganup ari.
Legan ni bulang ni parinangon, dong do homa bulang ni boru na marpanayok atap baru na ialop (pengantin baru). Legan do turpa, barang rumang ni bulang ni boru na marpanayok on humbani bulang ni parinangon. Rumang ni bulang na masa panorang on ma rumang ni bulang ni boru na marpanayok ai, goranni ai ma: BULANG SINI-PANEI . Anggo bulang ni parinangon goranni ai ma: BULANG SITEGET (martanduk dua dompak lobei) pakon BULANG MATUA (bulang ari-ari, lang pala taridah martanduk). Ganup bulang ai patugahkon na dob dong do parsimada bani naboru na mamakei bulang ai. Ase bani panorang patiga-tigahon (mamboban pengantin baru mardalani hu tiga, ase itandai hasoman na lang dihut iontang bani pesta), marbulang sini-panei ma naboru ai.

Halepakon na Masa Pasal Bulang.

Ase humbani na sinobut i babou in, boi do taridah na dob mosor do arti ni bulang banta sondahan on. Songon pengantin baru ma idahon age anak boru sonai ampa ompung-ompung. “Aiiiih lakan oooooi do!”, sonai ma ra nini ompungta ondi paidah-idah naboru Simalungun sondahan on.
Dob ai, masa ma homa sada nari na, sasintongni pamelahon, pasal bulang on. Masa ma homa, bani horja Palaho-Boru, ibulangi inang ma boruni laho borhat hun rumahni bani na marpanayok boruni pakon anak ni halak. Sasintongni, bani na borhat boru ai hun rumah, anak-boru (perawan) ope ia, lape gabe inang. Seng ia mangangkat boruni gabe inang. Dob das i rumah ni si dalahini pe ia iangkat gabe inang sinrumah ni dalahini, ai marhitei na ibulangi simatuani ia anjaha ipakeihon ma homa gotong bani simanjujung ni paramangonni, irik manlangkahi rudang saidangan.
Anggo nasungkun parboru na mambulangi boruni ai, balosni:” Sonai do hanami somal. Lang sah naahap anggo lang napakeihon.”
Lang nabotoh pastini, sadihari do na sonai ai gabe hasomalon. Ra, dob masa pe bulang na dob jadi, bulang na boi ipartangkuluk, parpudi on, boi ma marbulang parinangon na marsanggul. Anggo bulang ni na marpanayok sapari, dokahdo mamakeihon ai. Pori na marsanggul hinan boru ai, ningon itanggali ma lobei sanggulni ai, dob ai irahut sabolah babou ni simanjujungni. Ibahen sonai, ase ulang gabe juntul ipudi, anjaha ase sungkup ganjang ni bulang ai. Dob sonai pe ase boi ipakeihon bulang ai. Halani lang dos banggal ni simanjujung, sonai age ganjang ni bulang, ra porlu do isuba piga-piga hali, ase boi dearhonsi anjaha hot bulang ai (songon na manungkuthon dasi). Ase, lang tarjalo uhur anggo sapari dong masa mangharhari sanggul laho mambulangi boru na marpanayok i tongah-tongah ni loulouan. Ai sanggul tempel sondahan on do urah tanggalion, tapi anggo sanggul na sintong do, mahol do mangharhari ai.
Ambah ni na lepak i babou in, masa do igotongi homa helani (anak ni halak) irumahni. Ai lang na gabe anak ma, artini ai, helani ai i rumahni? Hiou TANDA HELA do hansa sisabeihononni laho mangangkat anakni halak ai gabe hela i rumahni. Tapang do sidea na dua manjalo hiou tanda hela ai, halani rap gabe “boru” ma sidea na dua i rumah ai. Dob ibere hiou tanda-hela, ipaingkat ma bulang bani boruni (sedo mambulangi/mangangkat gabe inang). Pori pe ibere homa pakon suri-suri ampa kaen sarung, tambah-tambah mando ai goranon.
Sonai ma arti ni ugas pakon horja sapari na mardomu hubani bulang.

Rimpunni.

Domu hubani hamajuon pakon hasomalan bani na mabuei (masyarakat) dear do dong na mubah, tapi namin, anggo arti pakon tujuan ni sada-sada horja pakon ugasan na mardomu hujai ulang ma mubah. Umpamani:
1. Lang tarbaen sai marbulang be ganup parinangon, tapi anggo marbulang ia, ulang ma bulang ni na marpanayok ipakei. Sonai age anak-boru, ulang marbulang, irahut ma gelah jambulanni ase tanda ia anak-boru.
2. Adat do mambere parpaingkat parboru bani boruni na marhajabuan, tapi ulang ma ipaingkat boruni marbulang, anjaha ulang igotongi helani.

Sonaima nasurathon pasal BULANG on, ase dong sibualhononta rombang, laho padomu riah na sonaha do sidearan bahenonta hunjon-hujanan laho manramothon anjaha manghagoluhkon ha-Simalungun-onta on. Diatei tupama.


Nanti lah aku terjemahkan ke bahasa indonesia ya,,,,,,
avatar
Pembajak
newbie
newbie

Jumlah posting : 11
Join date : 29.02.12
Age : 30

Kembali Ke Atas Go down

Topik sebelumnya Topik selanjutnya Kembali Ke Atas


 
Permissions in this forum:
Anda tidak dapat menjawab topik